Aratusteak 2015

Hasi da Txapel Txin Aratusteak iragartzen

Elurrarekin batera iritsi da Txapel Txin Aretxabaletara. Elurrak, baina, ez du kikildu, jakinik Aratusteak gertu direla. Eta horixe iragartzera joan da herriko ikastetxeetara, Kurtzebarri eskolara eta Arizmendi ikastolako Basabeazpi gunera. Umeek harrera bikaina egin diote, txapel dotoreak jantzita, eta bihar gainerako herritarrek ere txapela jantzita egingo diote ongietorria.

Egun guztian ibiliko da Txapel Txin jai giroan: "Aurtengo mozorroak Pello Zabalarekin zerikusi handia duela bakarrik esango dizuet", aurreratu du. Goiz partean txikiteoa izango da musikak lagun eginda, eta arratsaldean, 18:30ean, kalejira La troupe de la rue taldearekin. Torradak egindakoek orduantxe aurkeztu beharko dituzte lehiaketara; Herriko Plazan jasoko dituzte. Aratusteen ongi-etorri pregoia 19:30ean egingo du Txapel Txinek, eta ondoren, lehiaketako sariak banatuko ditu: lehenengoari, 100 euro eta Torratxin txapela; bigarrenari, 50 euro; eta hirugarrenari, 30 euro. Txapel dotoreena duenari, ostera, 50 euro emango dizkiote.
Ondoren, txistorra mokadutxoa eta torradak izango dituzte herritarrek, baita gura beste sagardo ere. Eta AviTxin disko jartzailearekin dantzan egiteko aukera izango da.

Hori guztia Aratuste-domeka girotzeko izango da, Txapel Txinek neska-mutikoei astean aurreratu dien legez: "Egin itzazue karrozak, izugarrizko karrozak, eta zuen gurasoak karrozak badira… horiek ere egin ditzatela karrozak! Mozorrotu eta ondo-ondo pasatu, disfrutatu horretarako eguna da-eta". Aholkuokin hurrengo urteetako harrobia zaintzen ahalegindu da mozorroen festa beste ezer baino gustukoago duen pertsonaia.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.