Herritarrendako berri pozgarria izatea gurako lukete Udal gobernuko kideek, eta zera gaineratu dute: "Instalazio bikainak dituen kiroldegi batean abonatzea orain merkeagoa izango delako Ibarra kiroldegian izena ematera animatzen dugu herritar oro".
Eskaintza kartazalak zabaltzen
LKS, Athlon eta Ondoan kooperatibek osatutako aldi baterako elkarteak urtarrilaren 31 arte kudeatuko du kiroldegia. Hala adostu zuten azaroan bi aldeek, elkarteak eta Udalak, eta otsailetik aurrerako lanak banatzeko lehiaketa bi deitu zituen abenduan Udalak.
Garbiketa zerbitzuaren kudeatze posturako sei enpresa aurkeztu dira. Lizitazio aurrekontua izan da 109.572 (BEZ barik) eta eskaintzen lehen kartazalak astean zabaldu dituzte. Hirugarren eta azken kartazala astelehenean zabalduko dute, eta ondoren hartuko du erabakia Gobernu batzordeak.
Kirol jarduerak, mantentze lanak eta harrera zerbitzua emateko, ostera, lau enpresa aurkeztu dira. Lizitazio aurrekontua da 322.645 euro (BEZ barik) eta urtarrilaren 19aren bueltan zabalduko dute eskaintzei dagokion azken kartazala. Orduan hautatuko dute hiru zerbitzuak emango dituen enpresa. Hala, ondo bidean, otsailaren 1arekin batera hartuko du beregain Udalak kiroldegiaren kudeaketa.
