Udalak antolatu eta Arteman Komunikazioak gauzatu duen hirugarren lehiaketa izan da –aurretik izan ziren Ostegun Bidaiariak eta Ostegun Akustikoak–; eta udazken-negu parteko eguenetan, Aretxabaletako tabernetan, herritarrei zuzendutako kultura eskaintza sustatzea izan du helburu oraingoan ere. Lau emanaldi izan dira azaroa eta abendua bitartean: Aitor Agiriano eskoriatzarrarena, Belen Azkarate antzuolarrarena, Iraitz Agirre arrasatearrarena eta bikote irabazlearena.
Barberenak eta Agirrek, elkarrekin egin zuten bakarrizketa saioa Express tabernan. Lehenengoak idazleen lanbidearen eta paperaren gainean jardun zuen; eta besteak, bertsolaritza kontuen gainean. Umorea izan zen nagusi orduan eta umore hori erakutsi du Barberenak saria jasotzerakoan ere. Udal teknikaria, bere aldetik, pozik agertu da lehiaketak eman duenarekin.
