Eskoriatzako, Aretxabaletako eta Arrasateko txistulari taldean batu dira gaur goizean Aretxabaletan, Leintz bailarako txistulari egunean: "Hiru herritako txistulari taldeek elkarren arteko harremanetan sakontzeko sortu genuen Alardea duela bost urte. Eta eman ditu emaitzak, ikusi besterik ez dago", dio Jokin Antxiak, Loramendi txistulari taldeko kideak. Izan ere, plazako alardea bukatuta eta oholtzatik jaitsita, txistulariek jo eta jo jarraitu dute, eta jai giroa nagusitu da.
Dianarekin hasi dute eguna 10:30ean eta ondoren, alardea egin dute herriko plazan. Ordu bete inguruko kontzertua eskaini dute, txistu, silbote, atabal, danbolin eta abarrekin. Herritarrek gustura jarraitu dute kontzertua eta batek baino gehiagok zioen: "Gehiagotan egin beharko litzateke. Txistua gurea da eta geroz eta gutxiago entzuten da".
