Maite Marcos aretxabaletarrak parte hartu duen filmak Almeriako western zinemaldian lehiatuko du

'Algo más que morir' filmeko kartela.

Urriaren 10etik 12ra bitartean Almeriako Taberna herrian egingo duten western zinemaldiko lehiaketan Algo más que morir (2014, 74 min.) filma emango dute. Orain dela lau bat urte grabatu zuten Kuartango herrian (Araba) eta aktoreen artean dago Maite Marcos aretxabaletarra. "Nork pentsatu behar zuen gure filma lehiaketa batean egongo zenik, eta film handien alboan, gainera!", dio hunkituta.

Kuartangon eta inguruko parajeetan grabatu zuten. Diru-laguntza gutxirekin baina ilusio handiarekin: "Jasotako laguntza apurrarekin herria egokitu genuen. Nire jantzi guztiak neuk josi nituen, baita beste batzuenak ere, eta elkarri makillatzen genion", dio Marcosek eta gaineratu: "Abentura handi bat izan zen guztia, eta orain abentura horren saria dator". Izan ere, "aparteko" saria dela Almeriako zinemaldian lehiatzea uste du: "Nire ilusioa filma pantaila handian ikustea zen, Gasteizko zinemaren baten edo, baina lehiaketa batean estreinatzea? Hori Maestranzan toreatzea da!"

Hurrengo egubakoitzean joango dira Tabernara, filma zapatuan estreinatzen dute-eta (Udal antzokian, 12:00etan). Kuartangotik ere 70 bat lagun doaz, alkatea gidari hartuta. "Oraindik inork ez dugu ikusi filma. Nik neuk zatirik ere ez muntatzen ibili zirenean, desilusiorik ez nuen izan gura-eta", dio. Eta emanaldiaren ostean solasaldia egingo dute.

Arrakasta handia izan duten El llanero solitario, Mil maneras de morder el polvo eta beste hiru filmen alboan lehiatu ondoren, Gasteizko zinemaren batera ekartzeko asmoa du produktore etxeak Algo más que morir.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.