Ekitaldia iragarri du irailaren 5erako Aretxabaletako Gure Esku Dagok

Mirari Altube Arrese 2014ko abu. 29a, 14:12

Aretxabaletako Gure Esku Dago lan taldeko kideek lanean jarraitzen dute. Hala, herritarrei eskerrak eman gura dizkiete, eta era berean, hemendik aurrerako bidea marrazten hasi. Horretarako, bi ekintza antolatu dituzte.

Batetik, ekitaldia egingo dute egubakoitzean, Herriko Plazan (18:30), bertsolari eta trikitilariekin, "ekainaren 8an lortutakoa Aretxabaletan ere ospatzeko".

Bestetik, aurrera begirako ibilbidea marrazteko ekarpenak jaso gura dituzte "guztiok garelako erabakitzeko eskubidearen aldeko dinamikan ezinbestekoak". Horretarako, galdetegi bat prestatu dute on-line erantzuteko. Egubakoitzeko ekitaldian ere erantzun daiteke.

Hona herritarrei helarazi dieten gutuna:

"Kaixo lagun!

Dagoeneko ia hiru hilabete pasa dira milaka Euskal Herritarrek erabakitze eskubidearen aldeko inoizko mobilizaziorik luzeeeeeena egin genuenetik. 
 
Ziur gaude, ekainaren 8a oroitzapen polita dela guztiontzat. Hemendik aurrera ere, horrela jarraitu nahi dugu, oroitzapen politekin erabakitzeko eskubidea gauzatzeko bidean urratsak ematen. 
 
Horretarako, bi deialdi edo proposamen luzatu nahi dizkizuegu. 
 
Badakigu erabakitzeko eskubidea gauzatu arteko ibilbidean urratsak eman behar ditugula, eta argi daukagu herritarrok izan behar garela bide horretan aktibo. Ekainaren 8a ez zen amaiera izan, hasiera baizik. Ekainaren 21ean, Euskal Herri osoko herritarrak bildu ziren Arrasateko Amaia antzokian, eta bertan, aurrera begirako ibilbidea marrazteko ORRI ZURI bat proposatu zuten, herriz herri jasotako ekarpenekin osatuko den ORRI ZURIA. Aretxabaletan, orri zuri hori marrazteko, lotura honetan daukazuen GALDETEGIA betetzeko gonbidapena luzatu nahi dizuegu. Irailaren 5erako jaso nahi ditugu ekarpenak, beraz, zure iritzia bertan plazaratzea eskertuko genizuke. 

Bestetik, ekainaren 8an lortutakoa Aretxabaletan ere ospatu nahi dugu eta horretarako, irailaren 5ean Aretxabaletako plazan elkartzeko gonbidapena luzatu nahi dizugu. Modu xumean antolatuta.

​Gainera, egunean bertan ere galdetegiak izango ditugu nahi dituenak erantzuteko.

Zure ingurukoei ere deialdiaren berri ematera animatzen zaitugu. Ea Kanpanzarren beste elkartzen garen!

Aurrera jarraitzea GURE ESKU DAGO!

Eskerrik asko!"

ALBISTEAK ESKUKO TELEFONOAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.

ASTEBURUETAKO BULETINA

Zure posta elektronikoan asteburuko albiste nabarmenekin osatutako mezua jasoko duzu. Harpidetu zaitez debalde hemen.


Harpidetza aukera guztiak