Musika eskolako taldeek jarriko dute abian 7x7 ekimena egubakoitzean

Musika eskolako gitarra-joleak parrokian emandako kontzertuan.
Udaleko Kultura Sailak antolatutako 7x7 kultura ekimena iritsiko da egubakoitzean, musikaz gainezka. Kultura kalera ateratzeko helburuarekin, eta ohikoak ez diren herriko plazetara eta gunetara eramateko asmoarekin dator; hala, kontzertua eskainiko du Leizarra musika eskolako konbo taldeak.

Mitarte kalean elkartuko dira Leizarrako musikari gazteak, 19:00etan. Hainbat taldek eskainiko dute emanaldia, eta guztietan gitarra doinuak izango dira protagonista, gitarra klasikoak eta elektrikoak. Eta horiei lagun egiten egongo dira bateria, pianoa eta trikitia beste instrumentu batzuen artean; baita ahotsa ere kantu batzuetan.

'Urrun erreinua' txotxongiloak

Eguaztenean, hilak 11, ostera, txotxongiloak izango dira protagonista kalean. El Tenderete-TTR taldeak Urrun erreinua eskainiko die 6 eta 10 arteko neska-mutikoei, Gipuzkoa plazan (19:00). Aldartek, Lesbiana, Gay eta Transexualen arreta zentroak, abian jarritako Txotxongiloak aniztasunaren alde delako kanpainaren barruan sortutako lana da, eta familia egitura eta gizarte eredu ezberdinen arteko elkarbizitza sustatzea du helburu.

Bandaren emanaldia 13an

Datorren egubakoitzean, ostera, musika eskolako bandaren kontzertua izango da Arlutz osteko kantxan.
Eta eguaztenean, hilak 18, Bihar txotxongilo taldeak Ipuin magikoak lana eskainiko die neska-mutikoei, Santa Kurtz kaleko plazatxoan.

Hilaren 20an, ostera, arpa eta perkusio emanaldia izango da Gurearen atzeko plazan; Ana Artetxe izango da arpan eta Iñaki Letamendia perkusioan.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.