Igor Arenazaren gidaritzapean egin zituzten entrenamendu saioak neska beteranoek eta partidurako gaztetxoagoen laguntza eskatu; hala, Arizmendiko senior taldean dabilen fitxaketaren bat edo beste egin zuten eta futbola utzi berri duten pare bat ere elkartu ziren.
Arizmendiko kadeteek, ostera, Alberto Garro izan zuten entrenatzaile eta denboraldia bukatu berri daudenez ez zuten aparteko entrenamendu saiorik egin beharrik izan.
Hasieratik aurreratu ziren kadeteak eta markagailuan 2-0 zela joan ziren atsedenaldira. Bigarren zatian hirugarren gola sartu zuten, baina beteranoek ez zuten amore eman gura eta baita gola iritsi ere. Azkenean 4-2 nagusitu ziren gazteak. Hala ere, jokatzeko gogoz geratu ziren antza, eta penaltiak jaurti zituzten bukatzeko.
Ikusleak ere hurreratu ziren talde bateko zein besteko jokalariak animatzeko, eta umore ona, lagun giroa eta futbola izan ziren nagusi Ibarran. Beteranoak, hala ere, ez dira konforme geratu eta udazkenean errebantxa hartu gura dute.
