'Gorriñaren bidetik' martxa maiatzaren 10ean egingo dute eta izen-ematea martitzenean bukatuko da

'Gorriñaren bidetik' martxaren berri ematen duen kartela.
Maiatzaren 10ean, zapatua, egingo dute Gorriñaren martxa Murrukixo mendizale elkarteak antolatuta: Aretxabaletako Durana kalean Murrukixok duen egoitzatik irten, Aizkorriraino joan eta buelta Durana kalera. 44 kilometro dira guztira, eta 2.400 bat metroko igoera. Izena emateko epea zabalik dago maiatzaren 6a bitartean: 50mendijarraian@gmail.com helbidean edo Murrukixon bertan, martitzen arratsaldean.

Ez da izango lasterketa, taldekako martxa baizik, eta hiru talde osatuko dituzte. 5 orduko taldean, dagoeneko lau lagunek eman dute izena; 6 ordukoan, zortzi batek; eta 7 ordukoan, oraingoz bakarrak, baina beste hainbat animatuko direlakoan daude, baita neskak ere. Hortaz, zalantzan dauden horiei anima daitezela esan gura die antolatzaileek.

Izena, baina banaka eman behar da (ez taldeka) eta norberak aukeratuko du gero 5 orduko, 6 orduko edo 7 orduko taldean joan gura duen.

Gorriñaren denborak

1932ko urrian egin zuen Gorriñak martxa hori. 7 ordu baino gutxiago beharko zituela egin zuen apustua orduan; baita irabazi ere.

Garai hartako lekukoek jaso zituzten haren denborak , eta haien arabera 06:00etan atera zen Aretxabaletatik kirolaria. Arantzazura 07:25ean iritsi zen eta Urbiara 08:19an. Handik ordubetera Aizkorrin zegoen (09:20) eta 8 minutuko atsedenaldia egin ondoren bueltako bideari ekin zion. Arantzazura 10:55ean iritsi zen eta beste 10 minutu hartu zituen mokadutxoa jateko. Hala, Aretxabaletan 12:45ean sartu zen, zazpi ordu baino gutxiagoan egingo zuela esandakoa betez.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.