Gainera, Jar gaitezen ekimenetik, eta Huhezirekin elkarlanean, Aretxabaleta argazkitan lehiaketa antolatu dute. "Herriaren errealitatea grafikoki deskribatuko duten hiru argazkitako bilduma osatzea da helburua". Hala, herriaren gaineko edozein gai, arlo edo errealitate islatuz, parte hartzaile bakoitzak hiru argazki aurkeztu beharko ditu lehiaketara. Guztietatik, hamar bilduma hautatuko ditu epaimahaiak eta Arkupen ipiniko dituzte ikusgai.
Abenduaren 4a izango da lanak aurkezteko azken eguna. Horretarako bidea jargaitezen@bagara.net helbidera idaztea izango da. Epaimahaiak aurkeztutako lanen artetik aukeraketa egin ondoren, kultur etxean erakusketa irekiko dute. Herritarrek, gainera, bozkatzeko aukera izango dute. Horrenbestez, bi irabazle egongo dira.
Sariei dagokienez, Ibarrako spa-gunerako eta hilabete osoko Arkupeko zine emanaldietarako sarrerak jasoko dituzte bi irabazleek. Baina, gainera, epaimahaiaren erabakiz irabazle suertatzen denak herriko jatetxe batean bi lagunentzako afaria ere jasoko du sari moduan; herritarren botoen ondorioz irabazten duenak, ostera, bertako produktuz osatutako otarrea.