Duela bi urte pasatxo hasi zen Aretxabaletako Jaiki elkartea Dantza Familian ekimena antolatzen. Udazken honetan ere egingo dute, eta azaroaren 10ean izango da lehenengo saioa. Hala, hamabostean behin domeketan elkartzeko asmoa daukate (16:30-17:30).
Jaikiko Maier Etxebarriak aditzera eman duenez Kuku Miku elkartearekin batera antolatu dute aurten lehenengoz Dantza Familian: "Izan ere elkarte honen proiektuarekin oso lotuta dago ekimen hau eta horregatik batu gara elkarlanean". Kuku Mikuren egoitzan elkartuko dira saioak aurrera eramateko.
Carla Fernandezen gidaritzapean arituko dira 2 eta 6 urte bitarteko neska-mutilak eta haien gurasoak, eta jolasak, mugimenduek eta irudimenak parte hartzaileen sorkuntza gaitasuna estimulatzen lagunduko dutela eman dute aditzera antolatzaileek.
Izen ematea jaikielkartea@yahoo.es edo 943 53 43 96 telefonoan. 3 euro ordaindu beharko dira pertsona eta saioko.