"Lehenengo aldiz antolatu dugu irakur punturako marrazki lehiaketa. Herritar guztiak animatu gurako genituzke parte hartzera". Hala azaldu du Joseba Lopez de Armentia liburutegiko arduradunak.
Orain arte markatzaileetan agertu izan den irudia enkarguz eskuratu izan da; aurten, baina, beste bide bati heldu eta herritarrei gura duten lana aurkezteko aukera eman diete.
Gaia eta teknika libreak
Azaroaren 8a baino lehen aurkeztu beharko dira lanak. Zehaztu dituzte lehiaketaren oinarriak: "Marrazkien gaia librea da, ez du zertan literaturarekin zerikusirik izan behar". Gura duten teknika ere baliatu dezaketela gaineratu du Lopez de Armentiak: "Eskuz eginiko lanak aurkeztu daitezke, baina baita ordenagailuz sorturikoak ere". Baina irudiaz gain, lelo bat ere azaldu beharko da aurkeztutako lanean.
Lehiaketan izena ematera animatzen direnek 14 urte baino gehiago izan behar dituzte. Eta lanek hainbat baldintza bete beharko dituzte, antolatzaileek azaldu dutenez. Besteen artean, 21 zentimetroko altuera eta 5,6 zentimetroko zabalera eduki behar dute tamainari dagokionez. Gainera, irudiek originalak izan behar dute, hau da, sekula argitaratu gabe egon behar dira.
Lanak udal liburutegian aurkeztu beharko dira azaroaren 8a baino lehen.