Denboraldiko joerak erakusteko modua –eta aitzakia– izaten da desfilea, Aretxabaletako merkatarien elkarteko presidente Idoia Elexpuruk aditzera eman duenez. "Herriko merkataritzari bultzadatxoa emateko sortu genuen Aretxartetik desfilea; gaurkoa seigarrena izango da".
Udazkeneko eta neguko joeretan herriko dendetan egongo dena bertatik bertara ikusi ahal izango dute herritarrek. "Sarri, kanpora joaten gara erosketak egitera, herrian zer dagoen jakin barik. Maiz ez dugu ohiturarik bertako dendetan sartzeko eta saltseatzeko. Aukera bat eman behar zaio bertakoari, eta ekintza honek kalera ateratzen du gure eskaintza".
UDAkoek euren tokia
UDAkoak ere desfilean izango dira. Taberna ipiniko dute Mitarten, eta jatekoa eta edatekoa salduko dituzte. Kirol elkarteko Igor Arenatzak herriko ekintzetan nahasita egotearen garrantzia azpimarratu du. "Aretxartekoak ekimen honekin hasi zirenetik beti egon gara hor. Bide horretan elkarrekin jarraitu dugu, eta aberasgarria da hartu-eman horrekin segitzea".
Eta Elexpuruk ere denbora honetan guztian elkarrekin aritu izana polita dela esan du: "Herri txikia gara, denok ezagutzen dugu elkar eta horrelako ekintzetan batera aritzeak ekimena bera indartzen du". Baina taberna ipintzeaz gain, hainbat jokalarik desfilatu ere egiten dute, Elexpururen esanetan.
50 lagunetik gora
50 lagunek baino gehiagok desfilatuko dute gaur. "Lotsak egon badaude, baina eskertzekoa da jendea prest azaltzea ekimenean parte hartzeko".
Hala, gaur, Kilima, Haurrak, Belar Meta, Titare, M5, Begira, Amaia eta Asensio dendetako udazken-neguko joerak ikusteko aukera egongo da, musikaz eta janariz girotuta.