Barneko emozioak askatzeko balio du barre egiteak, eta, era berean, baita erlaxatzeko eta gozatzeko ere; oro har, ekintza osasungarria da barrez lehertzea. Barreterapia saioetan bakoitzak barne-barnean daukan barre hori bilatu gura izaten dute.
Bihar, zapatua, kuartel zaharrean elkartuko dira, 10:30ean, Auria Diharceren gidaritzapean, hiru orduan zehar barrea lantzeko. Jaiki elkarteak antolatu du saioa eta bertako kide Maier Etxebarriak barreterapiaren garrantzia azaldu du: "Barrenak husteko, gorputza lasaitzeko eta aire fresko apur bat sartzen uzteko aproposa da".
Barrearen bidezko terapiaren onura gehiagoz ere egin du berba: "Bizimodu azkar honetan tarte txiki bat hartu behar da kontzientzia momentuan eta lekuan bertan jartzeko. Egon, mugitu, jolastu eta barre egin. Eta horrek guztiak sortzen duen plazerari lekua egin behar zaio gure bizitzan".
Gorputz mugimendua
Bestalde, urriaren 8tik (martitzena) aurrera eta Gabonak bitartean, gorputz-mugimendu laborategi bilakatuko da kuartel zaharra, Carla Fernandezen eskutik. Martitzenetan izango da, 17:30etik 19:30era.
"Dantza, kontzientzia, sentikortasuna eta kontaktua oinarri hartuta, praktika sortzailerako gunea izan gura du laborategiak. Gure gorputzak entzuten eta ulertzen ikasiko dugu eta espazioan mugitzeko eta espresatzeko gaitasuna garatu, mugimenduaren arteen diziplina ezberdinak erabiliz".
Izen-ematea ireki dute jaikielkartea@yahoo.es helbidean. 60 euro ordaindu beharko dituzte langileek eta 50 euro ikasle eta langabeek.