Asteburu borobila izan dute aretxabaletarrek: aurtengo San Migel jaiek inoiz baino arrakasta handiagoa izan dute eta herritarrak pozik agertu dira emaitzarekin.
Kantuan hasi zituzten jaiak egubakoitzean: Durana kalean kantu afaria egin zuten eta giro paregabe eta herrikoia izan zuten aretxabaletarrek.
Zapatu goiza indarrez hasi zuten azokarekin, barazki, talo eta sagardoz inguratuta eta, urtero legez, baserritar jantzita joan ziren azokara aretxabaletar gehienak.
Arratsaldean, herri bazkaria egin ostean, Beinke-Loramendi dantza taldekoek eta beste herritar askok Larrin Dantza jendetsua egin zuten Herriko Plazan.
Atzo, domeka, aje larregi ez zutenak herri kirolak ikustera ere animatu ziren. Harri-jasotzaile, trontzalari eta aizkolariek Herriko Plaza bete zuten.
Arratsaldean, Aretxabaleta Abesbatzaren emanaldiak itxi zituen aurtengo San Migel jaiak.