Talo usaina nabaria izan da goiz osoan zehar Durana kalean. Azokak jende asko erakarri du urtero lez: hasieran jende gutxiago ikus zitekeen baina eguerdi aldera kaleak betetzen hasi dira.
Herritarren parte-hartzea
Adin guztietako jendea zegoen azokan: txikienetatik hasita, helduenetaraino. Kurtzebarri eskolako haurrek urte osoan zehar landatutako barazkien postua bertan egon da eta beste aretxabaletar askok ere euren postua ere jarri dute. Ana Bolinaga alkateak adierazi duenez, San Migelak (abuztuan ospatzen diren Andramaixekin batera) munduko jairik onenak dira "herritarrek parte hartzen dutelako eta kalean laguntzen egoten direlako".
Arratsaldean ere, ez dira etxean geratu aretxabaletarrak: herri bazkaria amaituta, dantzan egitera animatu dira asko, Beinke-Loramendi dantza taldekoekin batera. Dantzariek azaldu dutenez, "aurten inoiz baino jende gehiagok hartu du parte Larrin Dantzan".