Barrea eragiteko hainbat esaldi erabilita, umore ukitua eman nahi izan zion Olabarriak atzoko hitzaldiari baina uneoro izan zuen gogoan azaltzen ari zen gaiaren seriotasuna.
Olabarriak adierazi zuenez, PP alderdiak onartutako Pentsioen Lege Aurreproiektuak gastua murriztea aurreikusten du. Pentsioen balio handitzea ez du KPIrekin lotu nahi eta horrek pentsiodunen eroste ahalmena gutxituko duela ekarri zuen gogora, baita etorkizunean pentsioa bizi-itxaropenaren arabera, eta ez bakoitzak lan egindako urte kopuruaren arabera, ezartzea aurreikusten dela ere. Europako hainbat estatutan pentsioetara BGPren %17 eta Espainian %10 bakarrik bideratzen dela gaineratu zuen.
Sarrerak handitzearen alde
PPren erreformaren aurrean, pentsio sistemako sarrerak handitzea da EAJren proposamena. Horretarako Olabarriak ezinbestekotzat jo zuen ezkutuko ekonomiarekin amaitzea, kotizazio-oinarrien zatikatzea eta langabeziaren aurka borrokatzea. Gainera, langabeziarekin amaitzeko PPk bi lege bakarrik proposatu izana kritikatu zuen.
Bi alderdien ikuspegia ezberdina bada ere, EAJ PPrekin negoziatzeko prest dagoela aitortu zuen Olabarriak: "Baina oraingo Lege Aurreproiektuarekin jarraitzen badute, ezetz bozkatuko dugu".
Sistema jasangarria EAEn
Herrialdeen jaiotze-tasak pentsio sisteman zeresan handia duela aitortuta, EAEko jaiotze-tasa baxua azpimarratu zuen Olabarriak. Hala ere, egungo pentsio sistema gurean jasangarria ei da, batetik langabezia tasa Espainiakoaren erdia delako eta bestetik, langileen ehuneko aipagarri batek gehienezko kotizazio-oinarria kotizatzen duelako.