Beteranoa da Aretxabaleta Abesbatza; 1981a ezkero elkartzen dira kideak kanturako. Urte hauetan gauzak asko aldatu direla eman du aditzera Angel Barandiaran zuzendariak. "Zaletasunak aldatzen joan dira, eta, horren ondorioz, gure gisako koruan gazte gutxik hartzen dute parte". Dena dela, egun 38 lagunek osatutakoa da Aretxabaleta Abesbatza.
"San Jose egun batez hasi ginen kantuan. Hasiera-hasieratik konpromiso zehatza ipini genion gure buruari: herriko jai nagusietan parte hartzea, hain zuzen". Esan eta bete. Hala, Urteberri egunean, Gabonetan, San Inazio egunean, Andramaixetan eta San Migeletan parte hartu izan dute kideek, besteak beste.
Askotariko estiloak interpretatu izan dituzte, gainera, Aretxabaleta Abesbatza osatzen duten kantuzaleek. "Gregorianoak, hemengo zein kanpoko folkloreetako abestiak eta zarzuelak... Denetarik abestu izan dugu". Hala azaldu du Nuria Fernandez de Arroiabe presidenteak.
Munduan zehar bidaiatzen
Aretxabaletan ez ezik, kanpoan ere aritu izan dira. "Euskal Herriko hainbat txokotan kantatu izan dugu, noski, baina kanpoan ere sarritan ibili gara: Frantzian, AEBetan, Italian, Espainian...".
Badute zer kontatu, gainera. "Vaticanoko liturgia batean kantatzen zuen lehenengo euskal korua izan ginen; 1986an izan zen. Oroitzapen politak ditugu".
San Migel jaiak eta Copreci
Bestalde, datorren irailaren 29ean San Migel jaietan elkartuko dira, eta, Copreciren 50. urteurrena ospatzeko, emanaldi berezia egingo dute abesbatzako kideek. "Lantegia presente dagoen tokiko kantuak interpretatuko ditugu, –Txina, Mexiko, Turkia, Brasil, Txekia eta Euskal Herria"–. Eta abesti horietariko batzuk dantzekin girotuko dituzte, gainera. "Lantegia oso garrantzitsua izan da herriarentzat, merezi du. Zorionak, Copreci!".