Espero baino herritar gutxiago animatu dira; hala ere, gogotsu hasi zuten 9:00etan 15,5 kilometro inguruko ibilaldia. Hasteko, Peñakulo-n dagoen Boliña-Azpi baserriraino autoz igo dira, eta hortik Kurtzebarri aldera egin dute. Ondoren, Ugaztegi ingurura iritsi eta bertatik Urkulura jaitsi dira.
Txondorren bueltan
Bidean, baina, hainbat geldialdi egin dituzte, txondorrak zeuden lekuetan, eta, horietan, ikazkintzaren inguruko kontuak izan dituzte berbagai. Loramendi elkarteko toponimia taldeak antolatu du ibilbidea; horren aurretik, baina, txondorren eta ikazkintzaren inguruko hitzaldiak egin zituzten, Fermin Pasamar, Jose Luis Madinabeitia eta Antonio Urkia txondorgileekin.
Jende gutxi baina pozik
Antolatzaileek pozik amaitu dute eguna, jende gutxi animatu bada ere. Aretxabaletan beste hainbat ekintza egon dira gaur, eta horrek zerikusia izan duela diote. Euren ustez orain arte egin duten ibilbide politena izan da, aurrekoak historikoagoak izan arren, gaurkoan paisaia ederrez gozatu dutelako. Beraz, etxera nekatuta baina jakintsuago iritsi dira ikazkin berriak.