Auto elektrikoez gehiago ikasi dute Aretxabaletako Lanbide Eskolakoek

Arrasateko Renault Autoberri kontsesionarioak utzitako bi ibilgailu izan dituzte erabilgarri goizean zehar eskolan.  Bigarren urtez antolatu dute ekimena, eta iaz emaitza onak lortu zituztenez, aurten errepikatzea pentsatu dute. Hala azaldu digu Joseba Beristain Lanbide Eskolako Automozio saileko buruak. "Dagoeneko auto horiek merkatuan daude, eta nondik norakoak ezagutu behar dituzte".

Auto elektriko zein hibridoekin lan egiteko orduan bide ezberdinak jorratu behar izaten dira. Esate baterako, gasolina edo diesel motordun autoek baino elektrizitate tentsio altuagoa dute eta segurtasun kontuak ikasi behar izaten dituzte egoerei aurre egiteko, Beristainen esanetan.

Baina motor eta auto elektrikoak probatzeaz gainera, gaian aditua den Patxi Diego bizkaitarrak ere Nissan elektriko baten gaineko azalpenak eman dizkie Aretxabaletako ikasleei.

Adi jarraitu dituzte karrozeria eta elektromekanikako ikasleek Deigoren azalpenak, eta probatzeko izan dituzten autoetan buelta baino gehiago ematera ere animatu dira. Frogatzea modukorik ez baitago zertaz hitz egiten den jakiteko.

Ikasleen jakinmina ikusita, datorren urtean ere errepikatuko dute esperientzia, ziur.