"Bakarrik aritze honek eskolako garaiak gogorarazten dizkit, maisuak arbelera irteteko agintzen zidaneko momentua" esan zuen Ruper ordorikak atzo Aretxabaletako Arkupen eskaini zuen kontzertuko une baten. Ez dakigu arbelean zer moduz moldatzen zen, baina kontzertuan behintzat ez zuen hutsik egin oñatiarrak.
Gutxi falta izan zen Zaraia aretoa goraino betetzeko, eta publikoaren artean Oñatiko koadrila bat edo beste ere ikus zitekeen.
Gitarra aldaketak
Agertoki sinple baina dotorean, bere azken laneko, Hodeien azpian diskoko Mundua biltzen duen oihartzuna kantuarekin hasi zuen emanaldia. Apurka apurka, kontzertuak iraun zuen ordu eta laurdenean, bere disko zaharren eta berrien abestiak nahastu zituen. Hala, bereziki indartsua izan zen Ene begiek klasikoa entzun ahal ian zen, baita Haizea garizumakoa edo Zuhaitz eroria oihanean bezalako pieza berriagoak ere.
Bi gitarra erabili zituen Ordorikak, eta ederki baliatu zituen bakoitzak ematen zituen aukerak kantu bakoitzari zukua ateratzeko, kantu bakoitzak eskatzen zituen ñabardurak azalerazteko. Horren adibide garbia izan zen, esaterako, Banekien abestia.
Horrelako kontzertuek abestiak ontzeko aukera eman ohi dute, eta Ordorikak ez zuen aukera galdu.