Zilindro formako labirinto bat, bolatxo bat eta jokalariaren abilezia; horiexek dira Bertikal izeneko jokoak dituen ezaugarrietariko batzuk.
Atzo arratsaldean aurkeztu zuten Aretxabaletan bertan eta jende ugari bertaratu zen aurkezpenera. Aurrena promozio bideoa proiektatu zuten pantaila erraldoietan, eta ondoren, Ainhoa Sanchezek barra atzetik Bertikali buruz egin zuen berba. "Herrian eta herritar batzuek egindako joko bat da eta horrek balioa ematen dio. Nik probatu dut, eta dirudiena baino zailagoa da amaierara iristea".
Maiatzean lehiaketa
Aurkezpenean azaldu zutenez Bertikal lehiaketa egingo dute maiatzaren 7, 9, 14, 16, 19 eta 21ean Dagdan tabernan bertan. "Euro baten truke eman daiteke izena maiatzaren 5era arte". Jasotako dirua ziurrenik gobernuz kanpoko erakunderen bati emateko izango dela eman zuten aditzera. "Finala maiatzaren 28an izango da, eta 700 euro daude jokoan".
Aurkezpenaren amaieran, kanpoaldean jokoa probatzeko eta erosteko aukera izan zuten bertaratu ziren guztiek.