Hitzaldi-mintegian, Fermin Muguruzak esan du aukera ona dela era honetako jaialdietan parte hartzea, sorkuntza arloan jendea ezagutzeko nahiz espreientziak elkartrukatzeko. "Teoria eta praxia nahasteko aukera ona da Huhezinema", gaineratu du. Gomendio batzuk eman ditu ikus-entzunezkoei buruz: "Ikus-entzunezko produkzio independenteek behar dute areto komertzialetatik haratago joatea, esate baterako, jaialdiak antolatuz".
Gazte jende ugari joan da Fermin Muguruza entzutera.
'Zuloak' dokumentala
Zuloak dokumentalak Euskal Herrian taula gainean dabiltzan hiru emakume musikariren errealitatea islatzen du; hasi berri den emakume rock talde baten istorioa jarraitzen du. Fermin Muguruzak oihartzun handiz estreinatu zuen iaz filma Donostiako Zinemaldian, eta atzerrian estreinatzen ari da orain: Santiago de Chilen, Kolonbian eta Brasilen, besteak beste. Eta ikus-entzunezkoa Krakoviara joango da laster.
Kontzertuak
Taldearekin munduan zehar egiten dabilen kontzertu-biran tarte bat eginda etorri da gaur, eguaztena, gure artera Fermin Muguruza musikari ezaguna. Eta aste bukaera honetan kontzertuekin jarraituko du. Atzerrian ere joko dute, besteak beste, Alemanian. Baina albiste txarrak ere jaso ditu, izan ere, atzo komunikatu zioten Madrilen zuen kontzertu bakarra bertan behera utzi dutela, "arrazoi politikoengatik".