Mondragon Korporazioko eta Aretxabaletako Udaleko agintariekin, eta komunikabide askoren aurrean, Copreciren planta berria inauguratu du Urkullu lehendakariak. Copreciko gerenteak, Javi Oleagak, irekitzat eman du pabilioia.
Copreci, euskal ekonomiaren eredu
Lehendakariaren hitzaldia izan da ekitaldiko une nagusia. Coprecik oinarrian duen talde-lana goraipatu du Urkulluk. Bere baloreak nabarmendu ditu: espiritu berritzailea, ekoizteko eta egiteko gaitasuna, nazioartera zabalik egotea, herrian sustraitua egotea eta elkarlana. Balore horiek euskal ekonomia osoaren baloreak direla gaineratu du. Eta horiei esker, euskal ekonomia krisitik irtengo dela esan du.
Pabilioiaz gain, kooperatibaren bi egoitzen artean dagoen Copreci kalea inauguratu du lehendakariak, beste agintariekin batera. Eta Copreciko harreran, 50. urteurreneko plaka ere erakutsi du.