Horixe azpimarratu du Igor Arenaza kirol zuzendariak: "Garaipen honek Aste Santuko oporren aurretik dugun partidurako indarra hartzeko balioko digu", esan zigun. Hondarribia taldearen etxean jokatuko dute hurrengo aretxabaletarrek.
Bost minutuan, bi gol
Partiduak bi izen propio izan zituen: Ander Fernandez eta Oxel Apraiz. Aretxabaleta "oso-oso indartsu" zelairatu zen, Arenazaren esanetan, eta Fernandez jubenilak segituan egin zuen lehenengo gola. Horren poza baretzeko astirik ere ia izan gabe, Oxel Apraizek bigarrena egin zuen. Bi golak bost minutuan etorri ziren. "Hainbat gol aukera izan ziren lehenengo zati osoan; batez ere UDArendako", esan digu Igor Arenazak. Kontuak kontu, atsedenaldira emaitza pozgarri horrekin joan ziren.
Beriok ere bere jokoa egiten zuen eta aretxabaletarren atera ailegatzen saiatzen zen; baina, halako baten, kontraeraso baten Ander Fernandezek jokaldia egin eta Oxelek buruz sartu zuen ate aurrean lasaitasunerako gola bere bigarrena.
Igoeraren bila
Horrenbestez, jardunaldi bukaeran laugarren postuari eusten dio Aretxabaletak. Amesten jarraitzeko moduko garaipena lortu zuen, igoera ematen duten bi postuetako batengatik borrokan jarraitzeko.