Koadrilek, Kultura sailarekin batera, antolatutako jaia da Txapel Txin Eguna, eta egitarauak zapatu arratsaldeko hitzorduak jaso arren eguerdi inguruan dagoeneko txikiteoari ekingo diote Txapel Txinek eta koadriletako kideek.
Torrada lehiaketa
Arratsaldeko ekitaldia, ostera, torrada lehiaketarekin hasiko dute (18:30); etxean egindako torradak (8 bakoitzak) jasoko dituzte Herriko Plazan. Ondoren (19:00) Begira talde bizkaitarrak eskainitako Txirla beltzaren piratak ikuskizunarekin kalejira izango da. Eta gero (20:00) Aratusteetako pregoia egingo du Txapel Txinek. Sariak ere banatuko ditu: txapel dotoreenari –50 euro– eta torrada goxoenei –lehenengoari, 100 euro eta Torratxin txapela; bigarrenari, 50 euro; eta hirugarrenari, 30 euro–. Bukatzeko, txistorra mokadutxoa, torradak eta sagardoa izango dituzte plazan elkartutakoek.