Halako hainbat dastatze antolatu ditu UDAk azken urteotan, elkarterako dirua batzeaz gain herria girotzea beste helburu barik. Oraingoan, gainera, Aretxarte merkatarien elkartea du bidelagun, eta azken egunotan txartelak banatu dituzte bezeroen artean gaurko dastatzea debalde egin dezaten: "Eskerrak eman gura dizkiogu Aretxarteri, denok elkarlanean Aretxabaletak aurrera egingo duelako", diote.
Buzkantzaz gain beste mokadutxo batzuk ere izango dituzte aukeran herritarrek, txistorra eta txorizoa esaterako; eta guztiak euro bate truke. "Ez hotz, ez euri, ez gaitu ezerk beldurtuko denondako lekua dago-eta Pagaldain". Zozketak ere egingo dituztela iragarri dute: Reala ikusteko sarrerak… Eta ekitaldi horrekin Arkupen jarritako erakusketari bukaera emango dio UDAk; ikusi ez duenak bihar arte du aukera.