Ana Bolinaga alkateak eta Lore Martinez Ingurumen zinegotziak aurkeztu zuten atzo, astelehena, ideien zaparrada. Gogorarazi zuten Aretxabaletako udalbatzak ekainaren 11n egindako osoko bilkuran onartu zuela %80tik gorako birziklatze tasak lortzeko helburua, eta era berean, helburu hori bermatzen duen hondakinen bilketa sistema baten aldeko konpromisoa.
Alkateak gaineratu zuen: "Osoko bilkuran erabaki zen ahalik eta hondakin gutxien sortzeko azterketa abiatuko zela mankomunitatearekin, herritar, elkarte eta eragile ezberdinekin batera; eta adostuko zuela herritarrekin zein den hondakinak kudeatzen duen sistema egokiena".
Ideiek bermatu beharrekoa
Proposatutako proiektuek honakoa bermatu beharko dutela jakinarazi dute:
- Hondakinen bilketa gaika egiten dela
- Derrigorrez biztanleriaren %100ak parte hartuko duela
- Bilketa pertsonalizatua dela, jarraipena izan dezan
- Gutxienez %80ko birziklatze-tasak lortzen dituela
Aurkezteko azken eguna abenduaren 20a
Proposamenak aurkezteko 30 eguneko epea dago, hau da, abenduaren 20a bitartean. Idatziz aurkeztu beharko dira udaletxean bertan edo honako helbidera bidalita: udala@aretxabaleta.net.
Ideiekin batera honakoak azaldu beharko dituzte:
- Proposatzailearen datuak: izen-abizenak, NAN, helbidea eta kontakturako modua.
- Proposatutako proiektuaren deskribapena (ahalik eta zehatzena).
- Partaidetzarako ezarritako bermeak betetzen dituela ziurtatzea.
Proposamenak Debagoieneko Mankomunitatera bideratuko dituzte horien bideragarritasuna azter dezaten teknikariek. Egun dauden bilketa ereduekin alderatuko dituzte eta ondorioekin txosten bat osatu. Txosten horretan sistemarik egokiena aukeratuko dutela jakinarazi dute, "beti ere eraginkortasun irizpideetan oinarrituta (emaitzak, alderdi teknikoa eta ekonomikoa)".
Ondoren, jasotako proposamen horiek Arkupen jarriko dituzte herritarrek ikusi eta baloratzeko. Udalaren webgunean ere egongo dira ikusteko moduan mankomunitateko teknikariek egindako txostenarekin batera –www.aretxabaleta.com–.