Orratzak hartu eta lanera
Eta zer da zuk zeuk egin dezakezuna? Ba puntua, gantxilloa edo gustuko duzun antzeko edozein eskulan. Arantzazu Lagunilla eta Amaia Beitia dira ekimen horren bultzatzaileak. Puntua egitea gustatzen zaie biei eta zaletasun hori beste debagoiendar batzuekin partekatu nahi dute: "Duela urte asko ezagutzen dugu elkar. Nik Donostian horrelako topaketa batean parte hartu nuen eta bertan ikasi nuen puntua egiten; beraz, zergatik ez horrelako deialdi bat Debagoienean?", dio Beitiak.
Ondo pasatzea eta zaletasuna partekatzea da helburuetako bat, baina baita elkarrengandik ikastea ere: "Oso aberasgarria izan daitekeela uste dut. Seguru nago elkartzen garenon artean asko ikasiko dugula. Nik txapelak egiten ditut, baina ez dakit eskularruak egiten; beharbada, elkartzen garenon artean norbaitek irakatsi ahal dit eskularruak egiten", dio Lagunillak.
Urriaren 27an herriko plazan
Hitzordua egina daukate dagoeneko; urriaren 27an elkartuko dira Aretxabaletako plazan. Asmoa da inguruko kafetegi batera joatea eta zerbait hartu bitartean orratzei eragitea. Deialdia irekia da, baita hutsetik hasi nahi dutenendako ere. www.marahmaran.com webgunean dago deialdiaren gaineko informazio guzti-guztia.