Berritasunekin, baina era berean, tradizioari ondo eutsita, indartsu etorri eta joan dira San Migel jaiak Aretxabaletan. Izan ere, egubakoitzetik (hasieratik) domekara bitartean egindako ekitaldi guztietan, herriko kultura eta kirol elkarte, dantza eta musika talde, txistulari, gazte, emakume musika eskola, abesbatza eta oro har, herritarren parte-hartze erabatekoa azpimarratzeko moduko ezaugarria da San Migeletan. Deigarria da asteburuko ekitaldi guztiek erakarri duten jendetza.
Kantuan eginez hasi eta bukatu dira jaiok: kantu-afariaren berritasunarekin eta abesbatzaren tradiziozko kontzertuarekin. Eta bion tartean izandako ekitaldietan zaila litzateke zehaztea zerk izan duen arrakasta gehien.
Esaterako, kantu afarian 300 lagundik gora elkartu zen; 450ek aukeratu zuten, berriz, presoen aldeko zapatuko bazkaria. Eta azoka ekologikoaren hasieran goian behean euria bazen ere, atertu ahala jendea perretxikoak legez agertu zen.
Bukatzeko, atzoko herri-kirolen saioa zein abesbatzarena, beti bezain arrakastatsu joan ziren.
