Zast!-en bigarren kontzertua da etxean, urtarrileko estreinaldiaren ondoren, eta emanaldi berrituarekin datoz letrei zein musikari dagokionez: "Azken hilabetean bereziki koraltasuna lantzen aritu izan gara, taldekide bakoitzaren parte hartzea aztertzen eta indartzen", diote.
Taldekideei dagokienean ere berritasunak dituzte. Batetik, Eñaut Zubizarreta txelo-jotzailea faltako da oraingoan –hurrengoetan jarraituko du–, eta bestetik, bigarren perkusio-jole bat sartu dute taldean, Iñaki Kortazar eskoriatzarra: "Bi perkusio-jolerekin indarra eta erritmoa eman dizkiogu ikuskizunari. Kortazarrek kaxoi flamenkoa jotzen du eta Martin Antxiak bonbeta, platerak, txastona eta perkusiozko beste musika tresna batzuk". Bi horiekin batera izango dira Maialen Arratibel (gitarra eta ahotsa), Leire Elustondo (pianoa eta ahotsa), Iñaki San Miguel (klarinetea) eta Beñat Zamalloa (narratzailea).
Ane Arrutik bakarlariak osatzen du Arrutiko Intxaurrak; abesti goxoak eta umorezkoak tartekatzen ditu eta euskal taldeen bertsio bereziak egin ere bai. Isuo Sasiiak, ostera, doinu bitxiak eta klasikoak jorratzen ditu.