Zuzendaritza batzordeko kideek diote UDA "aretxabaletarron taldea" dela eta "denon zerbitzura dagoela". Horregatik "elkarteko ateak zabalik" dituzte beste kirol batzuetan, orain arte UDA barruan egon ez diren horietan, jarduteko. Eta gaineratu dute "banaka, binaka edo taldean kirola egin, ikasi eta lehiatzeko beharrezkoa den guztia egiteko ahalegina egingo dutela", tartean estatutuak egokitu.
Kiroldegi berria aprobetxatu
Egun zazpi kirol daude UDA barruan: futbola, pilota, mendia, txirrindularitza, areto futbola, karatea eta gimnasia erritmikoa. Baina laster zabalduko duten kiroldegiko instalakuntza berriei ahalik eta etekin handiena atera gura die "herriko kirolari eta kirolzaleen onurarako". Hori horrela, UDAk hurrengo atal edo sekzio berriak izango dituela iragarri dute: eskalada; saskibaloia; eskubaloia; igeriketa; padela; squasha; tenisa; badmintona; judoa; aikidoa; waterpoloa; eta beste batzuk.
Kirol horietan edo beste batzuetan interesa duen edonor hartuko dute pozik UDAko kideek eta "ahal duten neurrian babestu eta laguntzeko" gertu azaldu dira.
Emakumeen kirola bultzatu
Aretxabaleta Kirol Elkarteko kideek, gainera, emakumeen kirola bultzatzeko ahalegin berezia egin gura dute.