Benavente genealogista kataluniarrak bi urteko ikerketa sakona egin du, eta horren ondorioa da abizen horrekin lotuta jaso dituen 308 orrialde eta 48 zuhaitz genealogikoak. Guzti hori lortzeko, Euskal Autonomi Erkidegoko 18 artxibo, Espainiako beste zazpi eta Argentinako bat kontsultatu ditu.
Hala, jakin du egun Isasmendi deitura bakarrik dutenak ere Isasi Isasmendi zirela jatorrian: "Isasmendik adar bakarra dauka: Goroeta elizatetik datorrena. Ez dago besterik, eta hori ez da batere normala; bakarra dela esango nuke. Isasi abizenak, ostera, hainbat adar ditu Euskal Herri osoan sakabanatuta". Eta jakinarazi du Isasmendi abizenaren sei aldaera sortu direla azken bost mendeetan: Isasmendi; Ysasmendi; Isasi-Isasmendi; Isasi Isasmendi; Ysasi-Ysasmendi; eta Ysasi Ysasmendi. Horren guztiaren gainean jardungo du bihar Arkupeko Zaraia aretoan.