Urtarrilaren 29an bete zituen 20 urte espetxean Kepa Urrak, eta hori gogorarazteko Hiru baietz ekimena antolatu du herritar talde batek. Hala, Almeriara martxa egin zuten joan den egubakoitzean 50 bat lagunek: "Bertan dagoen Kepa Urra eta gainontzeko euskal presoei elkartasuna adieraztera joan ginen", jakinarazi dute han izandakoek. Egun osoa eman zutela espetxe inguruan gaineratu dute, eta oihuen bitartez bertako presoekin egoteko aukera izan zutela.
Beste ekitaldi batzuk ere antolatu dituzte. Gaur, mahai-ingurua izango da Arkupen (19:00) sakabanaketaren eta bizi arteko zigorraren gainean jarduteko. Abokatu bat eta herriko presoen senideak elkartuko dira bertan.
Zapatuan manifestazioa
Hiru baietz ekimena zapatuan bukatuko dute jai giroak eta aldarrikapenak bat eginda. Bolo txapelketa egingo dute lehenengo herriko bolatokian (17:00); eta gero, manifestazioa herriko kaleetan (19:00), bolatokitik irtenda. Bukatutakoan mokadutxoa eskainiko diete antolatzaileek elkartutako guztiei.