Ikastaroko emakume gehienak etorkinak dira: sahararrak, marokoarrak eta Hego Ameriketakoak: Honduras, Peru, Kolonbia… Hainbat eskola jasotzen dabiltza, horien artean daude etxeko garbitasun lanak, ingurumen kontuak, amatasuna…
Antolatzaileen helburu nagusia emakume horiek lanerako prestatzea zen ekimenaren bultzatzaile den Paloma Martinezen esanetan, baina emakumeek beste helburu bat dutela konturatu dira: "Lana topatzea da helburua. Hori horrela, indarrak batu eta elkarri lagunduta lan egitea proposatu diegu".
Praktikak herriko familietan
Prestakuntza ikastaroa bukatutakoan ordaindutako praktikak egingo dituzte emakumeek herriko etxeetan. Horien garbitasun zerbitzua debalde eskainiko diete 0 eta 5 hilabete arteko umeak dituzten Aretxabaletako familiei, "umeak txikiak direnean laguntza izugarri eskertzen delako" diote antolatzaileek. Hala, lau astetan emango dute zerbitzu hori martxoa eta apirila artean, astean bi egunetan (bi ordu).
Interesatuek izena eman dezakete otsailaren 20an, astelehena, hasi eta martxoaren 16a bitartean. Udaletxera jo dezakete edo honako telefono zenbakira deitu: 630 24 78 71.