Biribil Zirku taldeak hasiko du jai giroa bihar (19:00). Pasapayasos ikuskizuna eskainiko du talde bilbotarrak, eta pailazo, akrobata, malabarista, orekari eta hankaluzeekin beteko dira herriko kaleak; hona egingo duten ibilbidea: Arkupe, Herriko plaza, Durana eta Mitarte kaleak, eta buelta. Plazan borobilduko dute hain zuzen, ekitaldia.
Ondoren (20:00) aurtengo Aratusteen berri emango du Txapel Txinek plazan, eta torrada lehiaketako sariak banatuko ditu. Txapel dotoreena daramanari ere emango dio saria (50 euro). Eta jai giroarekin jarraitzeko txistorra mokadutxoa eta sagardoa eskainiko dituzte, lehiaketako torradekin batera.
Torrada lehiaketa
Aurten ere egingo dute torrada lehiaketa, eta plazan jasoko dituzte herritarrek etxean egindako postre goxoa (16:30-18:30). Bakoitzak zortzi torrada ekarriko ditu gutxienez, eta kartazal itxi batean norberaren datuak.
Sariak Txapel Txinek banatuko ditu gero (20:00), eta banatzerakoan bertan egon beharko dute derrigorrez irabazleek, bestela sari barik geratuko direla jakinarazi dute antolatzaileek. Hona onenek jasoko dituzten sariak: lehenengoak, 100 euro eta Torratxin txapela; bigarrenak, 50 euro; eta hirugarrenak, 30 euro.