Aretxabaletako Loramendi euskara elkarte barruan, iaz sortutako Sustapen Taldeak gertatu du ikuskizuna. Kepa Errasti aktore aretxabaletarrak zuzendu ditu herritarrekin grabatutako esketxak eta Oihan Vega irrati esatari bergararrak bideratu zituen emanaldiak.
Ikuskizun arrakastatsua
Oihan Vegak emanaldia egunkarian irakurritako titular kezkagarri batekin hasi zuen: "Euskaraz dakiten hiru euskaldunetatik bik gaztelaniaz hitz egiten du egunero" esan zuen. Eta beste datu bat ere ekarri zuen gogora Vegak: Euskaldunen %80k sexu harremanak hamabost egunean behin izaten ditu.
Vegak hauxe ondorioztatu zuen: "Denbora gehiago egiten dugu gaztelaniaz hitz egiten txortan baino eta hori ez da ona. Hobeto biziko ginateke bi titularrak alderantziz izango balira: Euskaldunen %80ak hamabost egunean behin egiten du gaztelaniaz eta hiru euskaldunetatik bik egunero egiten dute txortan".
Hortik abiatuta, bizitzako hainbat une errealetan gertatzen dena gogorarazi zuen Vegak; euskaraz ez dakigula iraintzen, txisteak ere orokorrean ez ditugula euskaraz kontatzen, ume guztiekin euskaraz hitz egiten dugula baina gero geure artean hitz egiten dugunean gaztelaniara joateko joera daukagula...
EGA ziurtagiria, euskaltegiak edota euskal kantagintza ere izan zituen hizpide. Azpimarratu zuen naturaltasunez hitz egin behar dugula eta hau esaten amaitu zuen ikuskizuna: "Bai sexurako eta bai euskararako, honekin edo harekin, baina egin".
Balorazio positiboa
Herritarrak izan ziren sketxetako protagonista eta Kepa Errasti zuzendariak balorazio positiboa egin zuen: "Oso polita izan da bideoetan herritarrak azaltzea eta eskertu nahi diet lehenengo momentutik egin duten lanarengatik. Ikus-entzuleak oso gustura egon direla esan didate, barre algarak ere entzun dira, eta pozik nago emaitzarekin".