Lau urteko neska-mutikoak etxe eta eraikinen gaineko proiektua lantzen hasi ziren Basabeazpi gunean, orain hilabete inguru; "kontu batek beste bat ekarri zuen" eta hara, jolas egiteko etxetxoa eraiki dute.
Gurasoen laguntza
Arkitektoa den guraso batek egin zien proiektua eta zehaztu zenbat kaxa behar zituzten, 775: "Hasieran ezinezkoa iruditu zitzaigun hainbeste lortzea, baina hori baino gehiago jaso ditugu", dio Marta Arriaran irakasleak. Eraikuntzan lan egin izan duen beste guraso batek atea eta leihoa egokitzen lagundu zien, eta beste batek kaxak zelan itsatsi erakutsi: "Elkarlanean jardun dugu guztiok, eta ikusmin handia sortu du ikastolako guraso eta aiton amonen artean", azaldu du Iñaki Gonzalez irakasleak.
Neska-mutikoen eskaerei erantzunez tximinia egin diote eta oraindik beste xehetasun batzuk ere jarriko dizkiote, txirrina eta gortinak esaterako. "Oso gustura egiten dute jolas, batzuetan sukalde bihurtuta eta hurrengoan egongela", dio Gonzalezek.