Aretxabaletako Berdintasun Zerbitzua, Emakunderen laguntzarekin, eta Udaleko beste arlo batzuekin batera dabil egiten hirigintzaren gaineko azterketa. Horren helburua da batetik, herritar guztiek leku publikoetan parte hartu eta goza dezaten berdintasun baldintzak bermatzea; eta bestetik, erabakiak hartzeko garaian dauden aldeak murriztea. Bost alderdi aztertuko dituzte diagnosian: irisgarritasuna; mugikortasuna; hornidura eta zerbitzuak; segurtasuna; eta emakumeen gaineko adierazpen sinbolikoa.
Galdetegia betetzeko
Gaur, hilak 19, hasita galdetegi batzuk betetzeko aukera izango dute herritarrek, eta bertan bost alderdien gaineko galderak erantzungo dituzte. Galdetegi horiek honako lekuetan erantzun ahal izango dira: osasun etxean, udaletxean, Arkupe kultura etxean, ludotekan, gaztelekuan eta Zainduz gimnasioan.
Bestalde, bihar, martitzena, batzarra egingo dute Arkupen (18:00) horren guztiaren gainean jarduteko. Iritzia eman edo ekarpenak egin gura dituztenak gonbidatuta daudela jakinarazi dute antolatzaileek.