Gabonetako futbol txapelketaren aurkezpena egin dute gaur Aretxabaletako Arkupen. Besteak beste, Realako eta Eibarreko ordezkariak egon dira, Nekane Soria eta Igor Romero. Biek ala biek azpimarratu dute halako txapelketek duten garrantzia. Azken urteotan aurrerapauso garrantzitsua egin du emakumezkoen futbolak. Gipuzkoan hirukoiztu egin dira federatu txartelak. "Reala oso gustura dator Aretxabaletara. Gipuzkoa gure etxea da. Emakumeen futbola zaindu egin behar dugu. Oso inportantea da presentzia ematea. Ikustezin bagara, ez gaituzte aintzat hartuko", esan zuen Nekane Soriak.
Hiru helburu
Lauko txapelketa antolatzearen helburu nagusiak hiru dira: emakumezkoen futbola sustatu, Euskal Herriko maila goreneko taldeak gurera erakarri eta ibarreko ordezkariei halako txapelketa bat jokatzeko aukera ematea.
Parte-hartzaileak
Alebin mailan lau taldek jokatuko dute: Arizmendik, Aloña Mendik, Bergara eta Lagun Onak. Infantila mailan zortzik: Arizmendi, Arizmendi-Mondra, Bergara, Aloña Mendi, Urki, Lazkao, Beasain eta Anaitasuna. Azkenik kadete mailan lehiatuko dira: Arizmendi, Arizmendi-Mondra, Bergara, Aloña Mendi, Eibar, Lazkao, Beasain eta Anaitasuna.