Lanbidekoak Euskal Herriko Automobilismo Federazioarekin elkarlanean ari dira gertatzen serieko automobila rally txapelketetarako eta gaur goizean Lanbiden bertan izan da federazioko presidente Angel Gurrutxaga.
Auto hori orain arte Txus Jaiok probatu du eta egubakoitzean, esan moduan, Valentziara eramango dute. Miguel Fuster Espainiako txapeldunak gidatuko du auto hori domekan jokatuko den Valentziako Abarth Kopan. "Proiektuarendako ona da horrelako txapeldun batek autoa gidatzea", esan du Gurrutxagak.
Valentziako txapelketaren ostean, baina, Galiziara eroango dute beste lasterketa batera.
Lanbidekoak pozik
Lanbideko ikasle eta irakasleak oso pozik daude lasterketa kotxe bat euren eskolan ari direlako prestatzen; Joseba Beristain irakasleak esan digu ikasleendako oso motibagarria dela eurak egunero ikasten ari diren gauzen erabilgarritasuna ikusten eta aplikatzen ari direlako.
Lasterketen ostean, asmoa da kotxea berriro Lanbidera eroatea abenduaren erdialde ingururako eta orduan ere aldaketa eta hobekuntza berriak aztertu eta egingo dituzte datorren urteko koparako gertatzeko.
Lanbidek beste modu batzuetako proiektuak egin izan ditu orain arte, baina lasterketetako kotxeekin egin duten lehenengo proiektua hauxe izan da. Etorkizunean espero dute horrelako gehiagotan parte hartzea ikasleen prestakuntzarako oso positiboa dela uste dutelako.