Lo apur bat egin eta gero, botak jantzi, eskiak hartu eta 180 kilotako trineoei tiraka zeharkaldi luze, hotz, eta bakartiari ekin zioten espedizioko kideek, atzo. Buruan zeregin garbia, 3.700 kilometroko ibilbidea egin, Hego Poloraino, eta handik Hercules Badiaraino joan; inoiz inork egin ez duen zeharkaldia.
Mikel Zabalza nafarra izan zen, satelitezko telefono bidez, eguneko lehen laburpena egiten lehena: "Lehenengo eguna izateko ibilaldi ederra egin dugu, dagoeneko itsasoaren mailatik 800 metrora gaude. Kometak atera ditugun arren haizea kontran izan dugu, eta desbideratzen ari ginela ikusi dugu. Txarrena da zorua ez dela batere laua. Esan digutenez elur asko egin du neguan eta haize zakarra ibili da; horrek esan nahi du zorua oso txarto dagoela, sastrugis betea (izotz gainean haizeak eta elurrak sortzen dituen koskak). Trineoak zulo horietan sartzen zaizkigu, eta nekagarria da aurrera egitea. Dena dela, ez du hotz handiegirik egiten, zero azpitik hamar gradu".
Oraindik hainbat egun beharko dituzte lurreko kontinente garaieneko (2.000 metro) desnibela gainditzeko.