Argazki taldeak antolatutako I. argazki rallyan bederatzi lagunek hartu dute parte eta antolatzaileak pozik daude: "Herrikoez gain, ingurukoak ere etorri dira, eta gustura gaude izandako erantzunarekin". Horregatik, eskerrak eman gura dizkiete joan den zapatuan lanean jardun zuten bederatziei. Bost gai banatu zizkieten egunean bertan, eta gehienez ere 50 argazki utzi behar zituzten egunaren bukaeran. Gero, gai bakoitzetik argazki bat hautatu eta aurkeztu dute. Hona gaiak: azoka ekologikoa; artisau feria; dantzak; eguneko giroa; eta gai librea.
Epaimahaia herriko argazkilariek osatu dute: Maria Jesus Sanchez, Ane Idigoras, Antonio Arquero eta Manuel Urtubi. Eguaztenean elkartu ziren argazkiak ikusi eta onenak hautatzeko, eta jakinarazi dute argazki onena izendatzea izan dela zailena.
Azaroan erakusketa
Lehiaketara aurkeztutako argazki guztiak Aretxabaletako argazki artxiboaren eskuetan geratuko dira eta argazkiokin erakusketa egingo dute Arkupen, azaroan.