4 eta 12 urte arteko neska-mutikoak elkartuko dira egunero Herriko Plazan. 31 begirale izango dituzte lagun horiek eta dagoeneko egitarau dotorea dute gertatuta inor ez dadin aspertu. Betiko ekintza eta jaialdiak izango dira nagusi, horiek dituztelako gustuko umeek: eskulanak, uraren eguna, altxorraren bila jolasa, jinkana, azken eguneko jaialdia… Baina berrikuntzaren bat ere iragarri dute Gazteria Zerbitzuko antolatzaileek: "San Fermin eguneko ohiko egitaraua aldatu eta ezustekoren bat edo beste sartuko dugu. Uztailaren 8an izango da hori".
Nagusienek txikiekin batera ospatuko dituzte jaialdiak eta egun bereziak, baina irteera gehiago izango dituzte: inguruko mendietara, igerilekura eta Galartzara gaua pasatzera, besteak beste.