25. urteurrena ospatzearekin batera Aretxabaletako Leizarra musika eskolak erakutsi du musikaren eta musikarien etorkizuna bermatuta dagoela herrian beste horrenbeste urtetarako.
Ikasturte amaierako kontzertua egin zuten zapatu eguerdian Herriko Plazan. Ez zen instrumenturik falta izan: biolinak, biolak, gitarrak, bateria, flautak, tronpetak, akordeoiak, txistuak... Dantza egiteko aukera ere izan zen; Aitor Sanchezek eta bere akordeoiak dantzan eta txaloka ipini zuen Herriko Plaza.
Sortzaileei omenaldia
Jokin Antxia, Eli Izagirre, Ricardo Garro eta Angel Barandiaranek intsignia bana jaso zuten zapatuan duela 25 urte ausartak izan zirelako eta zailtasunak-zailtasun Aretxabaletak musika eskola bat edukitzea posible egin dutelako. "Hasierak oso gogorrak izan ziren, baina gaurko irudia ikusita oso harro gaude egin genuenaz", zioen Garrok. Pablo Urkia Litri eta Ana Crespo–zenduak biak– ere izan zituzten gogoan, Leizarraren sorreran izan zirelako haiek ere.
Ekitaldia amaitzeko musika eskolako ikasle eta irakasle guztiek elkarrekin egun horretarako propio prestatutako abestia jo zuten.