"Karmeleren liburua argitaratzea ohore bat izan da. Hark utzi digun altxorra oso bizigarria da; bere edertasun eta sentipenez betetako poesia oso berezia da; nik uste euskal letratan gauza gutxi daudela Karmele Igartuaren poesia liburua bezain ederrik" zioen ekitaldiaren bukaeran Jose Angel Irigaraik, euskal idazle eta poetak eta Pamiela argitaletxeko arduradunak.
Hitzak orbainetan poesia liburua argitaratu zuenerako bazuen karmele Igartuak beste poesia liburu bat argitaratzeko asmoa. Itsaso kontra bat izena hartu du horrek eta heriotzaren eta bizitzaren arteko mugan zegoelarik idatzi zituen poesiez osatzen da. Irigaraik uste du poesia eta artea, heriotzaren eta bizitzaren arteko mugaren emaitza direla eta karmele Igartuak bere osasun egoera latzaren oso jakitun zela idatzi zuen orain argitaratu berri duten liburua. Oso poesia hunkigarriak ditu liburuak; une gogorren isla dira askotan, baina halako lasaitasun sentsazio bat uzten dizutenak.
Esan bezala, Karmele Igartuaren liburuarekin batera Tere Irastorzaren Eta orain badakit ere aurkeztu zuten Arkupen. Oso adiskide minak ziren Irastorza eta Igartua eta eskutik helduta egon ziren biak liburu hauek idatzi zituzten garaian. "Osagarri bezala ere ulertu daitezke" zioen Irigaraik.