Argazkien proiekzioa
19:00etan hasiko dute emanaldia. Karmele Igartua zenaren olerkiak Itziar Gomez idazle eskolako kideak eta gidoilariak irakurriko ditu. Baina, beste irakurketa paralelo bat ere egingo dute. Izan ere, Izaskun Etxeberriak hainbat argazki sortu ditu Igartuaren liburuan oinarrituta. Hala, olerki bakoitzari dagokion argazkiak proiektatuko dituzte. Izaskun Etxeberria Idazle Eskolako kidea da.
Itsaso kontra bat 2011n argitaratu duten arren, Igartuak berak bizirik zegoela idatzitakoak dira. "Hau da, ez da bere lanen bilduma bat. Amak bizi bizirik zegoela idatzi eta oraindik argitaratu bariko olerkiak dira", azaldu du Garazi alabak. Tere Irastorzak egin du edizio lana.
Bien arteko proiektua
Irastorzak eta Igartuak buruan zuten proiektuaren baitan dago gaurko emanaldia. Horregatik jarri diote Eta orain badakit itsaso kontra bat izena errezitaldiari. 2005ean elkar ezagutu zuten bi idazleek –Igartuak Idazle Eskolan izena eman zuenean–. "2007an amaitu zuen idazle eskola Igartuak, baina gero ikasleen koordinatzaile bezala ibili zen: web ataria, aldizkaria... sortu zituen", gogoratzen du Irastorzak.
2008an eta 2009an Ilunabar Literarioa egin zuten Aretxabaletan; eta, orduan, Igartuak berak irakurri zituen bere olerkiak.
Irastorza, musikarekin
Aitor Furundarenak, Iñaki Telleriak eta Garikoitz Mendizabalek Eta orain badakit (Pamiela, 2011) liburuarendako musika sortu dute. Bada, Furundarena eta Telleria gaur Aretxabaletan izango dira errezitaldiari musika jartzen. "60 minutu inguru iraungo du emanaldiak, musika barne", azaldu du Irastorzak. Bi liburuak erosteko aukera ere egongo da gaur Arkupen.