Aretxabaletako emakumeen lanak, ardurak, asmakizunak, kultur ekarpenak, zereginak, bizipenak, interesak, garaipenak, ilusioak eta beste hainbat kontu jasotzen dituzten argazkien bilduma osatzea da Udalaren helburua, eta herritarren laguntza eskatu dute horretarako. "Emakumeak urteetan zehar ikusezinak izan direnez, erabateko protagonista diren argazki erakusketa antolatzea da asmoa", jakinarazi dute kultur eta berdintasun teknikariek.
Antzinako argazkiak eta hurbilagokoak, guztiak jasoko dituzte. Arkupe kultur etxeko bigarren solairura eroan behar dituzte herritarrek: goizean, argazki artxiboak duen bulegora; eta arratsaldean, Kultura Sailaren bulegora. Argazki guztiak eskaneatu egingo dituzte, haren gaineko argibideak jaso, eta ondoren itzuli. Argazkiok modu digitalean ere itzuliko dizkiete jabeei.
Zenbat argazki jaso diren jakindakoan, irail inguruan, erabakiko dute antolatzaileek zelan gertatu martxoaren 8ra begira egin gura duten lana, eta antolatzen hasiko dira.