Kirol eskalada eta abentura uztartuko dituzte, muturreko baldintzetan bi lurraldeak zeharkatuz. TransAntartika2011 izena izango du egitasmoak. Naturgas, BBK eta BAT Basque Team-ek babestuko dute aurtengo proiektu hau.
Azkeneko urteotan Himalayan aritu izan da hirukotea; besteak beste, 30 zortzi milako baino gehiago dituzte hiruren artean. Oraingoan, ordea, "txipa aldatu" eta beste lurralde batzuk dituzte jomuga, erronka berrien bila. Abentura berri hau, edozelan ere, parentesi moduko bat dela adierazi dute gaurko aurkezpenean.
Groenlandia hegoaldetik iparraldera hamabost metro koadroko kometa batzuen laguntzarekin zeharkatu nahi dute; 2.300 kilometro, 40 egunean.
Hego poloko 3.700 kilometroak zeharkatzeko, ostera, 70 egun beharko dituztela esan dute. Igoeraren bat ere egin nahi dute, gainera, bai izotzetan, baita harkaitzean ere.