Ainhoa Sagarribai, Aretxabaletako PSE-EEko alkategaia: "Ekonomia bultzatzeko enpresei lagunduko diegu eta herrira inbertsioa ekarriko dugu"

 Zer eskaini nahi dio PSE-EEk, oro har, Aretxabaletari?

Aretxabaletako Udaletxean, gure herritarren beharrei aurre egiteko proiektu bat aurkezten dugu. Eta ziklo ekonomiko berri honetan gure helburua da gure udalerria lehiakorra izatea. Horretarako, inbertsio arloan, proiektu estrategikoei lehentasuna emango diegu eta ezingo dugu ahaztu ekonomia produktiboa gai sozialetara orientatzea, eta hala, aretxabaletarren bizimodua hobetzea.

Programaren ardatz nagusiak aztertuko ditugu jarraian, alorrez alor. Zer eskainiko diozue gazteriari?

Aretxabaletako sozialistak nahi dugu gazteen beharrei erantzuna ematea; arazo zehatzak dituzte eta neurri zehatzak behar dituzte. Gure lehentasuna da gazteen beharrak aintzat hartuta, harreman zuzena izatea udaletxe eta gazteen artean. Gazteen autonomia indartu eta euren bizimodua hobetu, solidaritatea eta berdintasunerako aukerak bultzatu eta gazteen partaidetza areagotu behar dituzten errekurtsoak eskaini. Etxebizitza eskuragarriak izateko aukera eduki dezaten. Euren ekintzailetasuna lortu dezaten laguntzak eskaini eta lanerako programak bultzatu nahi ditugu eta kulturara bideratu euren mugikortasuna, ohitura kultural eta kirolezkoak bultzatuta. 

Kultura kontuan hartuta, zer eskainiko diozue herritarrei?

Legealdi honetan lortu dugu Mondragon Unibertsitateak gure herrian ikus-entzunezkoen fakultatea jartzea; oraindik eraikina egokitzen ari dira baina oso garrantzitsua izango da. Bestalde, lortu behar dugu herriko lekurik garrantzitsuenetarikoa Kultura Etxea izatea. Ezagutzaren ateak zabaldu, eta pertsonen interesa eta sormena piztea da gure nahia eta kohesio sozialeko faktore gisa defendatzen dugu kultura. 

 Euskara aintzat hartuta, zer emango dio zuen alderdiak euskarari?

Egin zen ikerketa batean bi datu islatu ziren; alde batetik, Aretxabaletan euskara dakigun pertsona ugari gara baina, eta hauxe da kezkagarriena, nahiz eta ezagutu gutxi erabiltzen dugu gure artean. Adibidez, buruz ari naiz, ikerketan esaten zen gurasoek euren artean gaztelaniaz hitz egiten zutela nahiz eta euskaldunak izan eta umeekin euskaraz mintzatu. 14 urtetik aurrerako gazteak nahiz eta euskara ezagutu euren artean gaztelaniaz mintzatzen dira. Lehen denon ardura zen euskara ikastea, orain berriz, erabiltzea. Beraz euskararen erabileran zentratu behar gara, baina honetan denok dugu ardura. Euskara guztion ondarea da eta euskararen erabilera sustatzeko udal-planak izenpetuko ditugu, aurrerakortasun, adostasun eta eraginkortasuneko printzipioetan oinarritutako politika linguistikoa aplikatuz.

Eta kirolari dagokionez?

Kirol Etxea espero dugu urtearen bukaerarako prest egotea, agian urria edo azarorako, lehenago izaten bada primeran, baina gauzak dauden moduan ez dut uste. Lehen zeuden zerbitzuak baldintza hobean eskainiko ditu eta horiez gain,  berriak ere eskainiko ditu. Bestalde, Urkuluk potentzial asko dauka eta bien arteko konexioa edukitzea lortu izango bagenu…

Gizarte ongizateari dagokionez, berriz, zer eskainiko duzue?

Gizarte-ongizatearen arloari lehentasuna emango diogu, arlo horri herritarren premiekin bat etorriko diren giza baliabideak eta baliabide materialak eskainita.

Hirigintza kontuan zer emango diozue herriari?

Aretxabaletak hirigintza aldetik proiektu garrantzitsuak ditu, 4A gunea birmoldatzea oso garrantzitsua izango da. Dena den, Hiri Antolamendurako Plan Nagusia bultzatu beharreko da, hor erabakitzen da nola burutzen dugun Aretxabaleta aurrerantzean. Oso gai garrantzitsua da eta guztiz geldituta egon da legealdi honetan. Etxebizitza eskuragarria eta kalitatezkoa erosten laguntzeko erakundeen arteko akordioak bultzatuko ditugu.

Adinekoei dagokionez, zer eskainiko dio Aretxabaletari PSE-EEk?

Gizartean eta bereziki txikiekin harremanak izatea areagotu nahi dugu, horretarako, adinekoak txiki edo gazteekin aktibitateak egitea bultzatuko dugu, adibidez, umeei azaltzen desagertu daitezkeen jolasak, istorioak kontatu… Gizartean euren aztarna utzi behar dute.

Osasun etxea zaharren egoitza izandako eraikinera eroatea egoki ikusten duzue. Zergatik?

Aurreko zaharren egoitza oso leku egokian dago, oraingo osasun zentrotik gertu eta aretxabaletar guztiak ezagutzen dute. Bestalde, eraikin hori publikoa da, beraz, aretxabaletarren zerbitzura egon behar da. Osakidetzak dituen beharretarako nahikoa da, egia esanda, Osakidetzak ez du erabiliko eraikin osoa dakigunez. Beraz, beste zerbitzu bat eskaini dezakegu baita ere.

Droga menpekotasunaren gaineko ikerketa egiteko eskaera bideratu duzue. Nola doa kontua?

Martxoak 3an aurkeztu genuen mozio hori. Batzar batzuetan gai hau agertu zen eta entzun genuenean droga kontsumoa gorantz zihoala gazteagoen artean, izutu egin zigun. Inork ez du nahi bere herrian drogak egotea. Beraz, beharrezkoa da jakitea zein den zehatz-mehatz dugun errealitatea eta horretarako eskatzen dugu ikerketa hau. Honela, Aretxabaletan, dugun arazoa ezagutuko dugu. Neurri aproposak hartzeko errealitatea jakin behar da bestela irudipenak izan daitezke eta guk hau funtsezko gai bezala ulertzen dugu. Nola doan? Bada, osoko bilkura martxoaren 28an izan zen. Talde guztiek, Aralar izan ezik, alde bozkatu zuten. Eta orain zer egin behar dugun? Jakin badakigu, Udaletxeak, Eusko Jaurlaritzara ez duela ezer igorri. Idazkariak esan digu aste honetan igorriko dela. Espero dugu hala izatea. Bestela, atzeratu egiten bada ikerketa egiteko aukera galdu dezakegu eta hori onartezina da. Beraz, adi egongo gara.

Gazteendako lan programak ere bultzatu nahi dituzue...

Bai baina ez bakarrik gazteendako langabezian daudenentzako ere bai. Gazteek ezagutu behar dute euren lanerako inguruneak eskaintzen diena. Momentu horretan hartu behar dira erabakiak, ikasten jarraitu, unibertsitatera joan, lanbide heziketa. Presio askoko momentua da eta lagundu behar diegu behintzat aukerak euren esku jartzen. Bestalde, langabezian daudenak birziklatu egin behar dira lanera bueltatzeko eta horretarako laguntza eduki behar dute. Hori da gure nahia.

Zeintzuk dira herriaren premia nagusiak zure ustez?

Ekonomia bultzatzea, noski. Orain krisi egoeran gaude eta dena zaildu egiten da. Baina enpresei lagundu behar diegu eta inbertsioa erakarri. Berrikuntza eta teknologia berrien esparruan enplegua sorraraziko dute eta gure herrien ehun ekonomikoa eta enpresa-arlokoa zabalduko dituzten udalen aldeko apustua egiten dugu.

Herritik zer gustatzen zaizu gehien?

Uste dut jendea nahiko gustura bizi dela.

Eta zer da herritik gutxien gustatzen zaizuna?

Garraio aldetik oso komunikazio txarra daukagula. Aldundiak, Aretxabaleta guztiz ahaztuta dauka.

Zaborren kudeaketari buruzko zein eredu defendatzen duzue? Zergatik?

Sostengarritasuna gure alderdiarentzat oso gai garrantzitsua da eta betik esan dugu, bosgarren edukiontziaren sistema dela bikainena. Jendeak ezagutzen ditu edukiontziak, baita erabili ere, eta horregatik  bosgarren edukiontzia bultzatu nahi dugu. Birziklatzeko sistema egokia izateaz gain, gure kaleetan zaborrik ez egotea bermatuko luke, beraz higienikoagoa da eta jendeari askatasun handia ematen dio eta honetan baieztatu da aretxabaletarrak oso inplikatuta daudela eta eskertzekoa da.

Zergatik zaude politikan?

Udaletxetik jendearen bizitza hobetu dezakegula sinisten dudalako. Biztanleengandik gauden erakunde hurbilena gara. Gobernua eta Foru Aldundia jendeak urruntasunarekin ikusten dituzte gehienetan.

Zelako herria amesten duzu?

Herri lasai bat. Politikak presio larregi sartu du herrian eta pena da benetan.

Alkate irteten bazara, zein da egingo duzun lehenengo gauza?

Gardentasuna berreskuratu eta krispazioa gainditu. Aretxabaletak behar du euren zinegotziek ez izatea mesfidantza iraunkor bat bere gobernu taldearekiko. Gobernuan egon zaitezke edo ez, baina denok parte hartu behar dugu gure herriaren alde.

Beste zerbait gehitu nahi duzu?

Eskerrak eman nahi dizkiet aretxabaletarrei eskaini diguten bermearengatik. Eurak erabakitzen dute. Zabalik gaude euren eskaerak entzuteko, euren ordezkariak gara-eta.